У Брэсце і Маларыце 7 сакавіка прайшла аблава сілавікоў, затрымалі дзясяткі чалавек, паведамляе «Белсат» са спасылкай на свае крыніцы.
Выданню стала вядома пра затрыманне ў Брэсце і Маларыце мінімум 40 чалавек, многія з іх атрымалі 15 сутак арышту. Пасля рэйду знікла сувязь з юрыстам Уладзімірам Малеем, імаверна, ён таксама затрыманы.
Таксама крыніцы «Белсата» паведамляюць, што брэсцкі ізалятар часовага ўтрымання перапоўнены. Шмат людзей трапіла ў ІЧУ за падпіскі на «экстрэмісцкія» СМІ і за каментары.
«Акрамя таго, у ІЧУ шмат тых, хто вярнуўся з-за мяжы, і кіроўцаў-дальнабойшчыкаў. У чым абвінавачваюць апошніх — невядома», — паведамляе выданне.
Праваабаронцы пра масавыя затрыманні 7 сакавіка нічога не паведамлялі.