Прэзідэнт ЗША Дональд Трамп пацвердзіў, што яго сварка з Уладзімірам Зяленскім падчас візіту ўкраінскага лідара ў Авальны кабінет была часткай стратэгіі ціску на Украіну. Ён таксама заявіў, што рашэнне ЗША спыніць пастаўкі зброі Украіне не паўплывала на яе баяздольнасць.
Падчас размовы з журналістамі 17 сакавіка Трамп пракаментаваў інцыдэнт, які адбыўся 28 лютага ў Белым доме, калі яго сустрэча з Зяленскім завяршылася дыпламатычным скандалам.
«Нам трэба было змусіць Украіну рабіць правільныя рэчы. Гэта была няпростая сітуацыя. Вы ўбачылі невялікую сцэну ў Авальным кабінеце, але я думаю, што цяпер яны робяць правільныя рэчы, і мы спрабуем дасягнуць мірнага пагаднення, дасягнуць спынення агню, а потым і мірнага пагаднення», — заявіў Трамп.
Ён дадаў, што вайна на тэрыторыі Украіны забірае мноства жыццяў, і агучыў перакананне, што яго дзеянні былі слушнымі.
Акрамя таго, Трамп пракаментаваў пытанне пра спыненне паставак узбраення і разведдадзеных Украіне. Ён заявіў, што гэтае рашэнне «не мела ніякіх наступстваў» для ўкраінскай арміі ў Курскай вобласці Расіі.
«Не, не, зусім не. Зусім наадварот, я думаю, гэта было ацэненае, і мы павінныя разумець, і вы павінныя разумець, што калі я бачу, як хтосьці робіць нешта дрэннае, што прывядзе да вялікай колькасці смерцяў, адзіная прычына, чаму я ўмешваюся — гэта чалавечнасць. Я ўмешваюся дзеля чалавечнасці, бо там гіне шмат людзей», — падкрэсліў амерыканскі лідар.
Нагадаем, сустрэча Зяленскага з Трампам і віцэ-прэзідэнтам ЗША Джэй Дзі Вэнсам 28 лютага скончылася канфліктам. Трамп абвінаваціў украінскага лідара ў «нежаданні заканчваць вайну з Расіяй», а Вэнс заявіў, што Кіеў «не паважае Злучаныя Штаты».
У выніку канфлікту бакі не падпісалі пагадненне пра карысныя выкапні Украіны. Пасля гэтага ЗША спынілі пастаўкі зброі і разведдадзеных Кіеву.